აპრილის პირველ ნახევარში ჩინეთში ელექტროენერგიის მოხმარება გასულ წელთან შედარებით გაიზარდა, რადგან კორონავირუსით დაზარალებული ეკონომიკა თანდათანობით იწყებს აღდგენას და ქვეყანა ამსუბუქებს პანდემიის წინააღმდეგ ბრძოლის მიზნით მიღებულ მკაცრ შეზღუდვებს.

მსოფლიოს სიდიდით მეორე ეკონომიკაში ენერგიის მოხმარება აპრილის პირველ ორ კვირაში წინა წლის ანალოგიურ პერიოდთან შედარებით 1.5%-ით გაიზარდა, ხოლო ელექტროენერგიის გამომუშავება 1.2%-ით, განაცხადა ქვეყნის სახელმწიფო დამგეგმავმა ორშაბათს გამართულ ბრიფინგზე.

ჩინეთში ელექტროენერგიის მოხმარება მარტში 4.2%-ით, ხოლო თებერვალში 10.1%-ით შემცირდა წინა წელთან შედარებით, რადგან ხელისუფლებამ მკაცრი შეზღუდვები დააწესა მოგზაურობასა და საქმიან ოპერაციებზე, რათა შეეკავებინათ გრიპის მსგავსი ეპიდემიის გავრცელება, რომელიც პირველად ცენტრალური ჩინეთის ქალაქ უხანში დაფიქსირდა.

ეროვნული განვითარებისა და რეფორმების კომისიამ (NDRC) ასევე განაცხადა, რომ პირველ კვარტალში ელექტროენერგიის მთლიანი გამომუშავება წინა წელთან შედარებით 6.8%-ით შემცირდა. მათ შორის, თბოენერგიის და ჰიდროელექტროსადგურების გამომუშავება, შესაბამისად, 8.2%-ით და 9.5%-ით შემცირდა წინა წელთან შედარებით.

ელექტროენერგიის დაბალმა მოხმარებამ ჩინეთში ელექტროენერგიის წარმოებისთვის ყველაზე ფართოდ გამოყენებული საწვავის, ქვანახშირის, სპოტური ფასი პარასკევისთვის 498 იუანამდე (70.38 აშშ დოლარი) დაწია ტონაზე, რაც წლის დასაწყისიდან 11%-ით ნაკლებია.

ინდუსტრიული ანალიტიკური ცენტრის, ჩინეთის ქვანახშირის ეკონომიკური კვლევის ასოციაციის (CCERA) ექსპერტებმა ჩინეთში ქვანახშირის მოხმარება პირველ კვარტალში 870 მილიონ ტონად შეაფასეს, რაც წინა წელთან შედარებით 60 მილიონი ტონით ნაკლებია. მათ შორის, მხოლოდ ენერგეტიკის სექტორში ქვანახშირზე მოთხოვნა თითქმის 50 მილიონი ტონით შემცირდა.

ქვანახშირის მოხმარებისა და ელექტროენერგიის წარმოების ზრდასთან ერთად, ჩინეთში ქვანახშირის წარმოებამ მარტში რეკორდულ მაქსიმუმს - 340 მილიონ ტონას მიაღწია, განაცხადა პარასკევს სტატისტიკის ეროვნულმა ბიურომ.

წყარო: როიტერი